నెల్లూరులో దారుణం: రౌడీషీటర్‌ను రాళ్లతో కొట్టి చంపేశారు

నెల్లూరు నగరంలో మరో దారుణ హత్య కలకలం సృష్టించింది. స్థానిక ఆర్టీఓ కార్యాలయం సమీపంలో లక్షీశెట్టి సాయితేజ అనే రౌడీషీటర్‌ను దుండగులు అత్యంత కిరాతకంగా హత్య చేశారు. ఆదివారం రాత్రి అతడి తలపై బండరాళ్లతో మోది హతమార్చారు. ఈ ఘటనపై సమాచారం అందుకున్న డీఎస్పీలు గిరిధర్, జి. శ్రీనివాసరావు వెంటనే సంఘటనా స్థలానికి చేరుకుని పరిస్థితిని సమీక్షించారు.

మృతదేహాన్ని పోస్టుమార్టం నిమిత్తం జిల్లా ప్రభుత్వ ఆసుపత్రికి తరలించారు. ఈ హత్యపై కేసు నమోదు చేసిన పోలీసులు దర్యాప్తును వేగవంతం చేశారు. ఆధారాల సేకరణలో భాగంగా సమీప ప్రాంతాల్లోని సీసీటీవీ ఫుటేజీలను క్షుణ్ణంగా పరిశీలిస్తున్నారు.

హత్యకు గురైన సాయితేజపై గతంలో పలు కేసులు ఉన్నాయి. సొంత తల్లిని హత్య చేశాడనే తీవ్రమైన ఆరోపణలు కూడా ఇతడిపై ఉన్నాయి. వరుస నేరాలకు పాల్పడుతున్న సాయితేజపై పోలీసులు గతంలో పీడీ యాక్ట్ నమోదు చేసి జైలుకు పంపగా, అతడు ఇటీవలే విడుదలయ్యాడు. ఈ హత్య వెనుక బీవీ నగర్‌కు చెందిన మరో రౌడీషీటర్, అతని అనుచరుల హస్తం ఉండవచ్చని పోలీసులు ప్రాథమికంగా అనుమానిస్తున్నారు. ఆ దిశగా విచారణ కొనసాగుతోంది.